Аҳәынаҧ хәыҷи алыми

Аҳәынаҧ хәыҷи алыми   Бна тоурак аҿы инхон-инҵуан алым. Уи даара аҽырҧагьаны инеиааиуа абнара илан. Избанзар уи аҳас иҟан. Зегь зымчу аҧстәқәа раҳ ҳәа иашьҭан. Алым иацәымшәоз уи абнараҿ шәарах ыҟамызт. Ҽнак зны алым шыцәаз акәымкәа, бна ҳәынаҧ хәыҷык ыҩны икәыркәыруа ишнеиуаз алым инадыххылт. Уи амҩа зегь кны итәан. Аҳәынаҧ ахьцара амоузт, алым иақәкәырны аҿынанахеит. Алым алацәақәа аахнатын, аҳәынаҧ инамҵасны иакит. Аҳәынаҧ шәаны ақыџьқыџьра иахьаҿыз алым иаҳәо иалагеит: – Суҳәоит, Саҳ ухаҵкы, соужь, саргьы џьара бзиарак узызуп, џьара сухәап, – ҳәа. Алым абжьы ҭганы аччара иалагеит. – Иарбан бзиароу уара аҳәынаҧ хәыҷынӡара сара исзууран иҟоу, иулшагәышьои уара сара сзыҳәан? – аҳәеит алым. Аха усгьы аҳәынаҧ аарыцҳанашьан наҟ инаунажьит. Аҳәынаҧ хәыҷгьы аҧсы анаиу, игәырҕьаҵәа абна инылашәкәа ицеит. Ус ишыҟаз ҽнак зны Алым ҧагьа ашәарыцацәа ирымҧыхьашәеит. Иааркын ашаха дуқәа рыла аҵла иадҿарҳәалт. Ари ажәабжь иаразнак абна инахыҵәеит. Алым ахәаабжь аҳәынаҧ хәыҷгьы иаҳаит. Ишзахәоз ала иҩны иаакылсын, ашаха ахаҧыц ҵарқәа налаҵо мацара, ирыҕҕаны инықәнаҵеит, ашаха дугьы ааихнаҵәеит. – Угәалашәо, Саҳ ухаҵкы, уанысхыччоз, – аҳәеит уи аҽырпаҕьны алым иахәаҧшуа, – угәы иаанагомызт сара уара узы бзиарак ҟасҵап ҳәа. Аха аҳәынаҧ хәыҷгьы алым дуӡӡа еиқәнархар алшозаап. Аҳәынаҧгьы џьара иахьухәо ыҟазаап Алым аҳәынаҧ хәыҷ ажәақәа даара иархәыцит. Убри нахыс алым ҧстәы ду, ҧстәы хәыҷы ҳәа еилнахуамызт, зегьы пату рықәнаҵон.